Mae Prifysgol Bangor wedi cyrraedd safle 45 yn y Deyrnas Unedig yn y Times Good University Guide 2023. Gwellodd safle cyffredinol y Brifysgol o 19%, gan gyrraedd ei safle uchaf ers cyhoeddi’r canllaw cyntaf ddegawd yn ôl.
Mae'r canllaw, sy'n rhestru prifysgolion gorau'r Deyrnas Unedig, yn cynnwys naw o ddangosyddion, ac yn casglu gwybodaeth am bopeth o foddhad myfyrwyr i gyfraddau cwblhau gradd.
Ymysg ein llwyddiannau mae ansawdd addysgu sydd wedi cynyddu o’r 48ain safle i'r 20fed, a phrofiad myfyrwyr sydd wedi symud o’r 39ain safle lle i safle 31. Dringodd y Brifysgol hefyd naw lle o ran ansawdd ymchwil i gyrraedd y 40 uchaf, wedi i 85% o’n cyflwyniadau i’r Fframwaith Rhagoriaeth Ymchwil diweddaraf (REF 2021) gael eu hasesu fel gwaith sy’n arwain y byd neu’n rhagorol yn rhyngwladol.
Yng Nghymru, mae Bangor yn aros yn y 4ydd safle yn gyffredinol allan o wyth sefydliad. Mae'r Brifysgol yn yr ail safle am ansawdd ymchwil, ac yn drydydd am ansawdd addysgu a phrofiad ehangach myfyrwyr.
Mae’r llwyddiant diweddaraf yma’n dilyn perfformiad cryf yn yr Arolwg Cenedlaethol o Fyfyrwyr (NSS) a gyhoeddwyd ym mis Gorffennaf, welodd safle Bangor yn gwella o 54 i’r 19eg safle yn y Deyrnas Unedig ac i’r ail safle yng Nghymru.